越南水上木偶戲 water puppetry - by Chiu
2016-07-12
越南水上木偶戲 water puppetry
作者：Chiu
注：因燈光同器材嘅關係相片質素唔好，請各位自行腦補同多多包涵。
雖然係窮遊越南，但身為遊客都要做返啲遊客嘢嘅，因此就去咗睇越南獨有嘅水上木偶戲。劇場唔算好精緻，但都絕不馬虎，有backdrop有水池，啲木偶究竟會用咩形式出嚟呢！？
（日光日白時的劇場佈景）
坐到天開始黑就發覺唔係好對路… 燈光何解變到咁！？
我強忍住驚恐嘅淚水等到開場，背景音樂變成嗩吶（俗稱啲打）為主調嘅奏樂。個人覺得又未至於似中國嫁喜配樂咁歡騰，只是膽少如鼠的我望住咁嘅佈景聽住咁嘅奏樂聯想到大酒店。
不消一會，木偶就配合住啲打聲出現，此刻真係有嚇到失禁嘅感覺… 應該唔是神功戲呀化！？
近距離望住呢隻木偶配合住疑似喜慶啲打聲喺水面高速飄移兼手揈揈頭令令，加上男聲high pitch配音，心中閃過此地不宜久留嘅念頭，想即刻起身走人 :0)
以下就放少少相畀大家感受吓越南生活啦：
（天才小魚郎1）
（天才小魚郎2）
（粒粒皆辛苦）
（勇者鬥惡龍）
（神獸敦倫產卵的後現代愛情故事）
冇高科技投影或者CG，冇高機動性嘅木偶同設備，單憑木偶師嘅技術同配樂，簡簡單單就能夠吸引住眼球同表達到故事，有時候回歸簡撲都幾放鬆幾舒服。
係推介大家去睇嘅，幫大家做咗心理準備唔使好似我咁嚇到失禁，成個劇目應該會係一個好體驗，不用怕放心去吧！
[完]
