關於ArtLikeJai使用條款問題
張貼日期 : 2016-07-13
今日網上有朋友對ArtLikeJai網站之使用條款提出左一啲疑問, 所以我哋想澄清一下寫得唔夠清晰唔夠好嘅條款:
1: 使用者不能拒絕接收ArtLikeJai嘅電郵?
A: 其實呢一條的確係我哋冇做好資料搜集，非常抱歉。
其實當時我哋係希望用户收到關於使用ArtLikeJai嘅重要訊息，例如條款修訂，而我哋另外會有每月作品推介嘅電郵大家。但經大家指出，明白大眾絕對有權拒收任何電郵，故會改好呢條條款，寫清楚大家如果唔想收到可以send電郵至artlikejai@gmail.com同我哋講，非常抱歉。而我哋亦都唔會用大家嘅電郵作傳銷或任何商業用途。
2. 條款中(9)2.中，「閣下於ArtLikeJai共享作品將等同閣下同意我們該作品版權，包括但不限於再創作，發佈以及取得與其相關的利潤。」這句條款具體係咩意思?
A: 版權（即著作權）係屬於該作品的作者，但授權我哋做以下嘅事以令個平台運作到，我哋原意「發佈」即係我哋會以ArtLikeJai身分share網站中一啲作品去Facebook page、pinterest、instagram等社交平台做宣傳，以及指可以放上ArtLikeJai網頁比大眾瀏覽。
「再創作」指share時加多少少description，寫來源係artlikejai.com同個作者名，或者有需要時會加入ArtLikeJai公仔樣嘅水印，另外於網站中我哋會定時更換每版嘅banner，將不同人嘅作品放上去，可能會加入一啲文字。
而「利潤」只指營運相關，例如營運網頁衍生嘅收益，包括廣告、贊助（如果將來有的話），但絕對唔會擅自租賃出售大家任何嘅創作作品圖利！我哋保證一定會尊重所有人嘅創作！
非常抱歉我哋嘅字眼冇寫得好清楚而引起大家疑慮，由於冇專業法律顧問嘅幫忙，所以有啲字眼表達得唔夠清晰，我哋團隊會仔細研究討論，亦都會尋求多啲意見，並清楚列明有咩使用權需要用戶授權我哋，以使ArtLikeJai呢個平台運作得順暢。
我哋好願意同大家討論，亦會虛心改錯，務求令大家用得舒服。
我哋整呢個網站只係想自己用少少綿力整個平台出黎大家一齊用，所以好珍惜每個人嘅意見，有寫得唔好、做得唔好嘅地方一定會改到清楚，抱歉引起疑慮，亦歡迎大家指出我哋嘅不足，謝謝！
更多
